Ieri, Sabo 1 de Setenbre, go fato on jiro par Montecio Major par documentar el stato de mancansa de civiltà ke se sta respirando da on bel po de ani a sta parte.
Kive vedemo la prima foto ke mostra la strada ke porta ale poste del centro de Montecio. La strada xe serada par lavori ...ma i lavori no ge xe niancora. Datoke la sera istesa ge saria sta na gran manifestasion ("nòte bianca") altri parkeji in visinansa i xera seradi. On mucio de xente ke doveva ndar in posta ga violà la dispoxision, ma el comune el dovaria anca meter i citadini intela condithion de rispetar la lexe!
Co se vede intela seconda foto ge xe anca ki no tien conto del posto par i no-abili, e ki come intela
foto ki de fianco pensa ben de parkejiar inte on paso carabile. Ma pasemo ale scoasse, ke no ge fa de securo onore ai citadini de Montecio. Se ga da dire ke on toco inportante de coesto problema el xe dovuo ali imigrati. A conferma de coesto ve mostro coesta foto:
Kive semo davanti al call centre de fianco ale poste de Montecio, intei cerci go evidensià i rifiuti trati par tera, notare la visinansa del cesto par i rifiuti, ma co la frecia a go indicà on dei goti de plastica ge xera intel jiardineto de fianco ala Posta (de proprietà del oficio postal), a drita la foto del jiardineto. Alke mi go dimandà al jiestor del call centre: "gavio ona machena del cafe kive rento?" e lu: "si, parke?" e mi: "ah, coesto spiega tuti sti goti de plastica onti de cafe trati li" ...e l'altro: "si, parke? ke problema ge xe?" Amisi, gavio capio? "ke problema ge xe?" El problema xe la educasion de sta xente ke riva kive da noaltri!
Ma ndemo vanti parke no creo mia ke sipia solo lori a immasciare el paese, securo ke, co dixevo prima, se el comune nol mete i citadini intela condithion de poder conportarse in modo civile, xe senpre difizile metere a posto le robe. La foto ke vien de seguito mostra la via San Bernardin, essa xe priva de cestini ma la xe asà frequentà da xente ke ge camina vanti e indrio a piè. A dir el vero on cestin el ge xe, in piasa San Bernardin, meso roverso, inteon canton e pien fin al'orlo. Ona roba de gran utilità, vardè:
Me dispiaxe dirlo ma la educasion civica la xe a liveli asà basi, e par convinsarve ve mostro sta serie de foto co sto video:
Amisi, distengueve: reajì co ki no respeta le regole e de par primi el bon exenpio co el vostro conportamento; le grandi robe se fa scomisiando da coele picele!
3 commenti:
ciao Claudio,
conplimenti par el to blog. Credo che insieme podemo lavorar ben. Se trovemo a Sitade£a, se te ghea fa a vegner!
Me so rexo inaconto ke sto articolo el se podaria lexar come ke fusse ke in Montecio nisun respeta le regole de la strada, ke sarìa ona roba scorecta da dir. No a Montecio ge xe respecto del codexe dela strada e la xente respeta anca regole ke fazilmente se podaria non respectar dato ke no ge xe praticamente controli (semafori, pasajio de pedoni, etc.); insoma no voria ke se fraintendese: ge xe on abiso tra la provinsa de Vicensa e, tanto par dire, Milan. Ma nondemanco a me sento in dovere de sensibilizar la xente, ansi, proprio par coesto motivo xe necesario reajir deso, parke lasando nare le robe alo sbando la xente se sente abandonà e a coel ponto prevale el egoixmo civico ke desfa el tesuto civil social.
Grasie Giane, vegno de securo.
Posta un commento